REUNIÓN (por fin!) da Comisión Tripartita de Ensino Privado Concertado

Onte, xoves 24 de setembro, tivo lugar, por fin!, a reunión da CTEPC. As organizacións sindicais FETE-UGT, FSIE, CCOO e USO presentamos un escrito conxunto reivindicando a solución dos temas dos que xa vos falamos no UGT-INFORMA anterior:

Paga dos 25 anos: reivindicamos que o aboamento da paga apareza contemplado nas instruccións do pago delegado como un concepto retributivo vinculado á antigüidade,  de xeito que se faga efectivo de forma automática...

Acordo de mantemento de emprego: Reivindicamos a prórroga do Acordo finalizado o 31 de agosto mediante unha addenda que mellora o actual.

Melloras laborais e económicas para avanzar na homologación: Reivindicamos que a Consellería de Educación teña previsto para os orzamentos do próximo ano unha partida económica que posibilite:

• Establecemento dun complemento retributivo para o PAS
• Avanzar no proceso de homologación salarial por riba do xa acordado
• Pago de complementos de cargos
• Incremento de cadros de persoal
• Diminución de horas lectivas

Cómpre dicir que José Manuel Pinal Rodríguez, Director Xeral de Centros e Recursos Humanos, amosou un talante dialogante e receptivo. Mais tamén debemos dicir que o único compromiso que conseguimos pola súa parte foi o de que no prazo dunha semana nos respondería se é posible ou non o establecemento da Addenda para o mantemento de emprego.

Con respecto a todo o demais non ofreceu ningunha resposta concreta, limitándose a dicir que xa se falaría deles pero que deberiamos ter presente que os orzamentos da consellería diminuíran.  Quere dicir isto que non hai cartos para melloras salariais? É moi pronto para dicir nada. Xa veremos, xa vos informaremos. 

Xuntos podemos máis