Inicio arrow O Teu Sindicato
 
     
Actualidade
O Teu Sindicato
Centos de persoas concéntranse en toda Galicia contra a represión sindical Imprimir E-Mail
Escrito por UGT Galicia   
viernes, 23 de mayo de 2014

Centos de persoas concéntranse en toda Galicia contra a represión sindical e para demandar o indulto para sindicalistas condenados a prisión


Centos de persoas, convocadas por UGT, CCOO e CIG, concentráronse hoxe na Coruña, Ferrol, Santiago, Lugo, Ourense e Pontevedra, porque “Defender os dereitos da clase traballadora non é un delito”. O obxectivo destas mobilizacións é denunciar a represión sindical e para demandar o indulto para sindicalista condenados a prisión.

Conforme se agravan as políticas de recorte e agresión contra os dereitos das clases populares, asistimos tamén á reiterada criminalización da resposta social, especialmente a de carácter sindical. É tamén crecente a represión contra todas aquelas persoas e movementos sociais que, no libre exercicio de dereitos fundamentais, opóñense ás políticas antisociais do Goberno, esixen respecto aos seus dereitos e demandan condicións de vida e de traballo dignas.

Os sindicatos UGT, CCOO e CIG convocamos folgas para reivindicar o avance das condicións laborais, e no seu transcurso sucedéronse denuncias contra moitas das persoas que participaron nestas accións reivindicativas: no ano 2008, durante a negociación do Convenio provincial de transporte de mercancías da provincia de Pontevedra; no 2010, nas negociacións do Convenio galego de instalacións deportivas e, no 2012, no transcurso da folgaxeral do 14 de novembro.

Como consecuencia destas denuncias, varias persoas foron sometidas a xuízo, e houbo compañeiras e compañeiros inxustamente condenados a tres anos de prisión. É o caso de Serafín e Carlos, traballadores do transporte de mercancías, ou de Ana e Tamara, traballadoras do sector de instalacións deportivas. Os recursos presentados contras estas sentenzas foron rexeitados, así como a primeira solicitude de indulto de Serafín e Carlos. Nestes momentos está solicitado o indulto para Ana e Tamara e un segundo indulto para os outros dous compañeiros.

Os casos de Ana, Tamara, Serafín e Carlos non son os únicos: no noso país xa se deron máis, pero tamén no resto do Estado: na actualidade hai preto de 40 casos similares. Repítense sempre as mesmas pautas, así como as condenas que solicitan as fiscalías: penas desproporcionadas, inxustas e abusivas que pretenden amedrentarnos e debilitar a nosa capacidade de resposta como clase. De novo os tribunais, dictando estas sentenzas inxustas, colaboran na máis brutal represión contra a clase traballadora, convertendo nun delito a defensa dos seus dereitos, a loita por condicións de vida e de traballo dignas.

Mentres o poder actúa con esta dureza contra a clase traballadora, a Fiscalía e os tribunais manteñen unha actitude de total pasividade diante dos empresarios e empresarias que ameazan, coaccionan e vulneran todos os días os dereitos dos seus empregados e empregadas. Déixase de manifesto, unha vez máis, a que intereses responden o Código penal e o aparello xudicial responsable de aplicalo.

Toda esta grave situación ten un culpable directo e claro: o Goberno do PP. Coa súa política elitista e represiva, de confrontación co movemento obreiro e recorte das liberdades públicas, nos retrotrae en moitos aspectos ao franquismo; nin sequera nos últimos anos da ditadura pedíanse penas de prisión tan elevadas por defender os dereitos da clase traballadora. Os Executivos presididos por Rajoy e Feijóo, como bos gobernos de dereitas, aproban medidas serviles cos insaciables intereses das grandes fortunas, da patronal ou dos mercados financeiros; manteñen unha actitude de total permisividade con respecto á corrupción e delitos que cometen as súas amizades ou mesmo membros do seu partido.

Non podemos calar: temos que defender os nosos dereitos! Non podemos permitir que a loita sindical e a contestación social véxanse limitadas por estas actuacións ou polas novas reformas lexislativas que o PP está poñendo en marcha, como é o caso da reforma do Código penal ou a mal chamada Lei de seguridade cidadá; con elas preténdese lanzar un ataque brutal a dereitos e liberdades fundamentais como son a folgae a manifestación, expresións de contestación social que debe salvagardar calquera sociedade democrática.

Modificado o ( viernes, 23 de mayo de 2014 )
 
<< Inicio < Anterior 1 2 3 4 5 6 7 8 9 Siguiente > Final >>

Resultados 45 - 55 de 90
 
DESTACADOS
ASESORÍA
EN REDE